Euskaltzaleen Biltzarraren arbolaren itzalpean jar zaitez, pazientziaz entzun eta senti ezazu zuhaitz honen hatsa, honen barneko odolaren mintzoa. Beste zuhaitzekin batera mundua, herria eta bizitza kondatzen dizkizu, erroak gure lurrean sakon, abarrak lau haizetara, hostoak eguzkiari zabal, enborra sendo, lurra zeruari lotuz. Ipuinak ez dira beste hainbeste zuhaitz baizik oihan bat osatzen dutenak. Badira haritz legendak, nobleak bezain bihurdikatuak. Badira sagarrondo ipuin basak fruitu ezti-garratzak dituztena, gerezitze istorio xumeak gustuko pikor gozagarriekin, mendiko izei zuzenak zerua kontatzen dutenak. Eta hainbeste zoko-moko sasituak beren istorio-misterioak gordetzen dituztenak. Ahantzi gabe kondaira motzondo mamituak. Horien artean haizea badabil, bere fantasia hutsean haziak hedatuz nehork uste ez duen lurretan. Zutitu eta sar zaitez gure euskal ipuinen oihanean, gure gogoaren argi-itzal guneetan zehar, tenplu sakratuan, horrenbeste izate desberdinen konpainian. Nork daki ez duzun lamina edo Basajauna gurutzatuko? Eskutik hartuko zaitu eta mitologiaren bidean eramanen eramanen. Ikasiko dizu euskarak nola adierazten duen nor garen, nola pentsatzen dugun mundu osoa; azken finean, zenbat balio duen euskalduna izateak.
